Bu il dünya informasiya təhlükəsizliyi bazarının həcmi 80 milyard dolları ötəcək

“IDC” analitik şirkəti 2017-ci ildə dünyada kompüter təhlükəsizliyi ilə əlaqədar avadanlıq, proqram təminatı və xidmətlərin satış həcminin 8,2 faiz artaraq 81,7 milyard dollar təşkil edəcəyini proqnozlaşdırır. Yaxın illərdə illik artımın orta hesabla 8,7 faiz olmaqla bir qədər sürətlənəcəyi və 2020-ci ilədək bazarın həcminin 105 milyard dollaradək yüksələcəyi gözlənilir.

“ICTnews” Elektron Xəbər Xidməti “Computerworld” resursuna istinadən yazır ki, analitiklərin qənaətinə görə, rəqəmli transformasiya şirkətləri təhlükəsizlik vasitəçilərinə aktiv investisiya yatırmağa məcbur edir. Bu halda alışın 30 faizindən çoxu bank sahəsi, diskret istehsal və dövlət strukturlarının payına düşür. Alışı hamıdan tez genişləndirən (ildə 12 faiz) telekommunikasiya sahəsi artıq 2018-ci ildə ən böyük alıcılar beşliyinə daxil ola biləcək.

Proqnoza görə, yaxın illərdə bazarın ən böyük seqmenti xidmətlər - ilk növbədə idarə olunan təhlükəsizlik servisləri, eləcə də inteqrasiya və konsultasiya xidmətləri olacaq. Bu il onların payının 31,2 milyard dollara yaxın olacağı ehtimal edilir. 2017-ci ildə şəbəkə təhlükəsizliyi aparat və proqram vasitələri seqmentinin həcmi 15,2 milyard dollar, son nöqtə təhlükəsizlik vasitələrinin 10,2 milyard dollar təşkil edəcək. Bundan başqa, avadanlıqlarda boşluqların qiymətləndirilməsi proqram vasitələri (ildə 6 faiz) seqmentləri və idarə olunan servis təhlükəsizliyi (ildə 12,2 faiz), istifadəçilərin davranışının analizi (ildə 12,2 faiz) və inteqrasiya olunmuş təhlükəsizlik idarəetmə qurğu (UTM) (ildə 11,9 faiz) proqramları aktiv inkişaf edəcək.

2017-04-03 ||ictnews.az